Tumhara Shubhchintak

Pyare Faisal Bhai,

Yaad hai, jab hum sab school mein saath padhte the – Mai, aap, Kishore, Anupam aur Raghav?
Woh din jab har subah ek adventure lagta tha, aur hamari sabse badi chinta math test hua karta tha.
Hum sb kaise Ramesh ke tiffin ke aas paas jama hote the jaise woh ek khazana ka dibba ho, hansi aur kahaniyon ke saath uske khane se bhare har bite mein humare sapno aur ane wali musibato ki kahaniyan hoti thi.
Jha aap ek travel journalist, Kishore Architect, Anupam lekhak Ramesh ko toh kisnai mai hi ruchi thi, Raghav ko toh IAS hi bnna tha aur mere pass kbhi iss sawal ka jawaab nhi hota tha. Aaj Instagram scroll karte hue aapki story phir se dekh li. Roz koshish karta hoon ki na dekhoon, lekin aaj raha nahi gaya. Aapki thodi chinta bhi hoti hai. Dekha ki hamesha ki tarah aap Amsterdam mein the. Pichli story mein Prague, kabhi Zurich aur ek raat Eiffel Tower ko taron se chamakta dekh muskura rhe the.
Tumhari zindagi ke yeh rangeen pannon ko dekh kar mera chehra ek kadwa-meetha muskurahat sa de raha hai. Yeh woh sundar shaam dekhna jaise hai jab thandi hawa apke jism ko thithur jaye aur  dur dur tak umeed ke angethi bujh gyi ho.
Yeh sab dekhke dil ko sukoon milta hai, par kahi na kahi ek jalan bhi hoti hai.

Kabhi-kabhi apni asafaltayon ka aina samne aa jata hai, mann ko chubhata hua.
Khud ko samjhane ke liye kehta hoon, haan wahan salary jyada hai, par kharche bhi toh utne hi honge. Wahan mere 40 rupay kilo wale tamatar tumhein 1200 rupay mein milenge. Dhaniya bhi muft nahi. Wahan sab kuch khud karna padta hai, aur fir taxes bhi hain. Ghar ki woh garmahat aur sukoon kahan hai usmein?
Yahan par zindagi raat ke samay bhi zinda rehti hai. Dukaanein der tak khuli rehti hain, chai ki dukanon mein bheed hoti hai, aur sadakon par zindagi ka shor sharaba hota hai. Is bechaini mein ek anand hai, is aniyamitata mein ek entertainment hai. Har kone mein ek kahani hai, har shakhs ek kahani sunane ke layak hai. Tulnatmak roop se, main sochta hoon, wahan vyavasthit sadaken hai par jeevan 7 baje bandh ho jati hain. Shanti shayad shantipurna ho sakti hai, lekin us zindagi ki gati-may shor ki kami hai jo hamare paas yahan hai. Yaha jaisi raunak aur aaram kahan? 
Apne ghar leli par wha rhega kaun sbko itna bola mano ek kamra mera hi ho usmai, Jab mushkil aati hai yahan, toh sab saath aate hain. Padosi parivaar ki tarah ho jaate hain, dost madad ke liye haath badhate hain, aur ek aisi community ka ehsaas hota hai jo anmol hai. Main sochta hoon ki wahan ki alag zindagi kitni akeli mehsoos hoti hogi, jahan sab apne apne kaam mein vyast hain.
Wo choro apne Porsche bhi leli, meri favorite, jabki aapko gadi ka shauk bhi nahi tha ha isi story ke baad se maine apki stories dekhni chori thi par usse bhi aaram na mila.

Anupam se mila tha kuch dino pehle, Bangalore mein ek IT company mein job lag gayi hai. Usne bhi MBA karli, 25 lakh lagake. Sochta hoon, utne paise mein zameen le leta, wo bhi highway ke pass wali, aaj 50 ki hoti maine agent se baat bhi karli thi. Khair, aapki wo jyada sunta tha. Kishore mere jyada kareeb tha. Usne shaadi karli, dahej mein Scorpio aur 30 lakh nagad bhi mila hai. Haan, uski biwi thodi zyada jhagdaalu hai, maa se ladne mein kaafi waqt guzarti hai, aur usne ek naya shauk bhi pakad liya hai, reels banane ka. Puchne par kehti hai ki woh Switzerland jaana chahti hai whi jha aap ho.
Kya wahan ki sari khushiyan yahan se badhkar hain?

Kishore pass mein hai, uske dukh sunke thodi tasalli milti hai. Aap door ho gaye hain, aur aapki khushi dekhke dil mein chubhan hoti hai. Har raat neend nahi aati. Sochta hoon, aisa kya karoon? Shares mein paise duba chuka hoon. Ek business shuru kiya tha, wo entrepreneurship wala. Ghar-ghar cable connection deta tha, par ab sab WiFi aur smart TV wale ho gaye hain. Sochta hoon, akhir mujhe chahiye kya? Kya hai meri khushi? Aapko khush dekhke mujhe dukh hota hai, bas itna hi jaanta hoon main.

Yeh patra aap tak kabhi nahi pahunchega aur ise poora karte hi jala diya jayega toh jawab ki apeksha ab hai nhi mujhe par ha apko yeh btana tha ki jab jyada pareshan hota hoon, jaise aaj, Raghav se mil leta hoon. Haan, wahi hum sab mein sabse hoshiyar, sabse awwal. Hamara IAS, akhri attempt tha uska aur hamesha ki tarah is baar bhi interview mein wo chhut gaya duniya passion follow karne bolti hai aur shayad Raghav ne uski bhari keemat bhi chukai hai yah dekh mai 2 kdn aur piche kar leta hoon. 
Dukh to hai, udaas tha wo kaafi. Maa bimaar hain, pitaji ka dehant pichle saal corona mein oxygen ki kami se ho gaya tha. Jimmedariyan bahut hain, par bhagya saath nahi. 
Udaas to main bhi bahut hua tha, par agar wo pass ho jata to kya main sach mein khush hota? Aur yeh aapke, uske, Anupam, ya kisi aur ke safal ya asafal hone se mujhe kyun itna chubhta hai? mujhe itna farq kyu hota hai.
Is sawal ka jawab bhi shayad is patra ke saath hi jal jayega ya shayad bachpam mai meri chuppi ke sath hi khi gum ho gya.
Reh jayega to bas main, mere vichar, mere khayal mano jb bachpan mai sb kuch banna chahte the tb mai bas jeena chahta tha aur ab jb aas pass dekhta hun toh lgta hai mano sb jee rhe hai siwai mere.

Tumhara Shubhchintak 

By: Kshitij Sinha
14/7/2024